الصديق الحق ... ( إنت العنوان ).

المواقف الصعبة كالمصفاه ... تصفي لنا أصدقائنا

* الصديق الحق مثل الجبل كلما اقتربت منه رأيته عظيماً و شامخاً 

* الصديق الحق هو مثل ظلك بالمثل معك أينما كنت

* الصديق الحق هو الذى يظل بجوارك في الوقت الذى لا تجد حولك معظم أصدقائك

* الصديق الحق هو الذى لا ينساك فى أى دعاء .. يدعو لك قبل أن يدعو له 

* الصديق الحق هو الذى يسره ما يسرك و يحزنه ما يحزنك

* الصديق الحق هو الذي يهديك عيوبك .. أسمى أنواع الهدايا

ويحاول معك لاصلاح هذه العيوب

* الصديق الحق هو الذى مهما شغلتك الدنيا عنه .. فمكانك محفوظ فى قلبه

وإسمك منقوش فى ذهنه لا يمكن أن ينساك أبدا

* الصديق الحق هو الذى اذا قصدته فى خدمة ما , يلبيها اليك فى الحال 

هنيئاً لمن له صديق حق 

اللهم ارزقنا الصحبة الصالحة التى تعيينا على الطاعة 

شاركنا بصفات الصديق الحق من وجهة نظرك :)

لما ... ( إنت العنوان ) .

لما ..... لما حاجات كتير بتحصل شوف الافضل تعمل فيها ايه

لما 

تفكر تعمل موقف مع حد ... شوف الاول لو الموقف ده اتعمل فيك

هتكون مبسوط بيه وفرحان ولا هتزعل منه 

لو هتكون مبسوط منه وفرحان بسرعه اعمله ومتترددش

ولو هيزعلك الموقف ده ... أرجوك بلاش تعمله 

بلاش تزعل صاحبك منك وتخليه ولو للحظة واحدة يحس انه غلط لما صاحبك

لما

حد يطلب منك خدمة او يقصدك فى طلب وتقدر تعمله .. ارجوك بلاش تكسفه 

إعملهوله أصله بيبقى بيسألك وهو معشم فيك أوى  علشان كدة طلب منك الخدمة دى

متقطعش حبل المودة اللى بينكو

ولو متقدرش تلبى طلبه ده ... اعتذر ليه بطريقة مناسبة 

لما

حد يعمل ليك خدمة او عمل معاك موقف حلو

إشكره .... من لا يشكر الناس لا يشكر رب الناس

ولو العلاقة بينكو قوية جدا ومفيش بينكو شكر 

لان لما انت مثلا بتعمل حاجة لحد قريب منك أوى بتحس ان ده واجب عليك انك تعملهاله ... مبتكونش مستنى منه كلمة شكر طبعا 

واجب عليك تخدمه .. واجب عليك تسأل عليه .. واجب عليك تعمل الحاجات اللى بتفرحه وتسعده

خلاص مفيش بينكو شكر .... حسسه بأة بقيمة اللى هو عمله معاك  .... وإنك فرحان جدا انه عملها 

وإنه فى نظرك بيكبر يوم بعد يوم

لما

تشوف حد مخنوق بلاش تزودها عليه  .... لأنك بتبقى عامل زى اللى لاقى جرح وفضل يكبر ويعمق فيه

كلمه فى اى موضوع تانى عنك مثلا احكيله حاجة حصلت 

قوله موقف ممكن يخليه يبتسم وينسى شوية 

وبعد ما يروق كدة ابقى شوف كان مخنوق من ايه ولو فيه مشكلة حلها معاه وفكر معاه 

لما 

تكون فرحان بسرعه اتصل على صاحبك فرحه معاك 

لأنه هيفرح أوى لفرحك زى ما بيحزن أوى لحزنك

خلى صاحبك معاك على الحلوة والمرة 

لما .. مبتخلصش 

وكل اما افتكر حاجة ... هحطها فى لما بردو 

ولو افتكرت انت حاجة .... قولهالنا نفعنا بيها =))

طريقك خير ... ( إنت العنوان ).

بسم الله أبدأ وعليه أتوكل

هفتح معاكو شوية طرق كدة نعمل بيها خير واحنا فى طريقنا للكلية او المدرسة او الشغل او اى طريق هنمشى فيه 

*عاوزين نتفق على حاجة نقولها كلنا واحنا نازلين من البيت 

" بسم الله توكلت على الله ولا حول ولا قوة الا بالله العلى العظيم "

*قال رسول الله صلى الله عليه وسلم: ( إنكم لن تسعوا الناس بأموالكم فليسعهم منكم بسط الوجه وحسن الخلق ) رواه مسلم

بسط الوجه يعنى الابتسامة ... وتبسمك فى وجه أخيط صدقه 

وانت ماشى فى الشارع بتشوف ناس كتير وناس كتير بتشوفك 

خلى الابتسامة وبسط الوجه عنوانك ... حتى الابتسامة بتنقل شعور طيب للناس اللى قدامك 

على عكس الوجه العبوس

*لو شوفت طفل صغير إضحكله او لو وقتك يسمح اقف معاه شوية 

ولو بيعيط بأة اوعى تسيبه غير وهو بيضحك 

مرة كان واحد راجع من الكلية ولاقى طفل صغير بيعيط 

وقف عرف بيعيط ليه ... وقعد يضحك فيه و يهزر معاه شوية 

واداله حاجة حلوة بسيطة جداااااا ... وفوجىء الشخص ده 

بوالده الطفل بتقوله ده هو بيحبها أوى الحاجة دى 

مع انها بسيطة جدااا ... اعمل البسيط لعله هو اللى هيسعد الناس 

متتكسفش من قله الحاجة انت تتكسف لو كان فى ايديك تعملها ومعملتهاش

*منظر بشوفه يوميا وانا رايحة أى مشوار وأكيد كلنا بنشوفه

ستات كبار فى السن بيبيعوا خضار وفاكهة 

مش عيب ولا حرام ... صاحية بدرى علشان تجرى على أكل عيشها وعلشان تأكل اولادها 

هذه يد يحبها الله ورسوله

لما تشوف واحدة فى سن والدتك صاحية من بدرى جدا علشان تقعد فى الشارع تبيع 

ادعيلها دعوة بظهر الغيب ربنا يرزقها ويكرمها ويسعدها دنيا وآخرة 

*لو شوفت حد عاوز مساعدة ... ساعده لو وقتك يسمح 

لو ميسمحش اعتذر بأدب وذوق

*لو شوفت راجل كبير بيعدى الشارع عديه ووقف العربيات وخد بايديه وعديه الشارع 

*لو لاقيت حجر او اى حاجة فى وسط الشارع 

شيلها حطها على جنب علشان متأذيش غيرك 

مش هتقلل من برستيجك ولا هتقلل صورتك فى عين الناس 

بل بالعكس هيحترمك جدا و كمان هتكون هادى بأخلاقك

ولما يلاقوا حاجة فى وسط الشارع هيشيلوها ويحطوها فى جنب 

دى بعض الافكار اللى ممكن نعمل بيها طريقنا لطريق الخير 

لو عندك أفكار كمان ضيفهاااااااااااا متبخلش علينا بافكارك :)

المذنب ... (إنت العنوان ).

بسم الله نبدأ

كلامى ليك إنت نصيحى من اخت صغيرة أو كبيرة 

عاوزة أعرفك حاجة انك الشغل الشاغل لكل الشيوخ والدعاه ... كلهم عاوزين ياخدو بايديك من الهلاك  ويكونوا ليك طوق نجاه

كلنا عندنا ذنوب اكيد يعنى مفيش شك 

لان كل بنى آدم خطاء وخير الخطائين التوابون

نخطىء و نتوب ونستغفر لأن لنا رب رحيم يغفر الذنوب 

قال الله تعالى 

وَإِنِّي لَغَفَّارٌ لِّمَن تَابَ وَآمَنَ وَعَمِلَ صَالِحاً ثُمَّ اهتَدَى

وطبعا فيه آيات كتيرة فى القرآن الكريم  عن المغفرة ومدى رحمة ربنا بينا

وفيه حديث قدسى بحبه أوى

 أَبِي هُرَيْرَةَ ، يَقُولُ : سَمِعْتُ رَسُولَ اللَّهِ صَلَّى اللَّهُ عَلَيْهِ وَسَلَّمَ , يَقُولُ : " أَذْنَبَ رَجُلٌ ذَنْبًا ، فَقَالَ : أَيْ رَبِّ أَذْنَبْتُ ذَنْبًا فَاغْفِرْهُ لِي ، قَالَ رَبُّكُمْ : عَلِمَ عَبْدِي أَنَّ لَهُ رَبًّا يَغْفِرُ الذَّنْبَ وَيَأْخُذُ بِهِ ، قَدْ غَفَرْتُ لِعَبْدِي ، قَالَ : ثُمَّ لَبِثَ مَا شَاءَ اللَّهُ ثُمَّ أَذْنَبَ ذَنْبًا آخَرَ ، فَقَالَ : أَيْ رَبِّ أَذْنَبْتُ ذَنْبًا آخَرَ فَاغْفِرْهُ لِي ، قَالَ رَبُّكُمْ : عَلِمَ عَبْدي أَنَّ لَهُ رَبًّا يَغْفِرُ الذَّنْبَ وَيَأْخُذُ بِهِ ، قَدْ غَفَرْتُ لِعَبْدِي ، قَالَ : ثُمَّ لَبِثَ مَا شَاءَ اللَّهُ فَأَذْنَبَ ذَنْبًا ، فَقَالَ : أَيْ رَبِّ أَذْنَبْتُ ذَنْبًا فَاغْفِرْهُ لِي ، قَالَ رَبُّكُمْ : عَلِمَ عَبْدي أَنَّ لَهُ رَبًّا يَغْفِرُ الذَّنْبَ وَيَأْخُذُ بِهِ ، قَدْ غَفَرْتُ لِعَبْدِي فَلْيَعْمَلْ مَا شَاءَ " ، هَذَا حَدِيثٌ صَحِيحٌ ، أَخْرَجَهُ الْبُخَارِيُّ

اخطأت .... إستغفر ..... يغفر الله لك 

وقال رب العزة 

"وَقَالَ رَبُّكُـمْ ٱدْعُونِى أَسْتَجِبْ لَكُمْ"

وكأن الاستجابة نتيجة طبيعيه للدعاء ... تدعوه يستجب 

ادعوه ليغفر لك بيقين صادق انه يغفر 

وتأكد أنه لا يرجع يدك صفرا خائبتين

إحسن الظن فى الله ... تجده دائما عند حسن ظنك به

اتعلمت من دينى كدة

أكره الذنب ولا أكره المذنب

ودورى مع المذنب انى اقوم بأمره بالمعروف ونهيه عن المنكر

نصائح أخيرا ... ويارب صدرك يتسع لكلامى 

والكلام والنصائح دى ليا قبل ما تكون ليك 

لعلك أفضل منى .... بس بقوم بس بعمليه التذكير

فذكر فإن الذكرى تنفع المؤمنين

* متظلمش نفسك  معاك بالمعاصى 

ولو كانت نفسك ليك أمارة بالسوء .. فأمرها أنت بالمعروف وصحح سير نفسك 

حتى تكون ليك بالنفس اللوامة اللى دايما تلومك بعد اى خطأ ... وترجع تتوب وتستغفر وان شاء الله ربنا يغفرلك ويصلح حالك

إنقذ نفسك من أمواج الهلاك ... لانك فى الدنيا دى زى ما تكون فى عرض البحر 

والشهوات والمعاصى زى الموج العالى جدا 

لازم تقاوم امواج المعاصى والشهوات علشان متغرقش فى بحر الدنيا 

وأخيرا متحرمش نفسك من سماع القرآن ... بصوت شيخ انت بتحبه 

متحرمش عينيك من الدموع من شخية الله

متحرمش جوارحك من هذا الاحساس ... الخشية من الله 

إسمع دروس دينيه ... وليكن درس اسبوعى لاى داعيه اسلامى انت بتحبه 

اقرأ كتير عن الله  علشان تحبه أوى 

اقرأ سيرة الرسول صلى الله عليه وسلم 

وسير الصحابة واتعلم منهم 

لعل الله يحدث بعد ذلك أمرا 

أنت عليك إنقاذ نفسك اولا .. ومن حولك ثانياً 

رسالة سريعة ... ( إنت العنوان ) .

رسالة سريعه 

خليك واخد بالك إن أى حد مننا عنده هدفين

هدف قريب المدى وهدف بعيد المدى

هدف قريب المدى : ده الهدف اللى بيحققه فى الدنيا 

لأن الدنيا مهما طالت ومهما عشت سنين فهى منتهيه وقصيرة 

هدف بعيد المدى : الهدف اللى بتشتغل ليه وبتتعب علشانه فى الدنيا 

بس نتيجته بتعرفها فى الاخرة " جنة ولا نار "

جعل الله مكانكم الجنة وابعد عنكم النار 

فلازم ميكونش فيه تعارض بين الهدفين " قريب المدى وبعيد المدى " 

لما تيجى تحط هدفك القريب اللى فى الدنيا 

ابنيه على تقوى الله 

لان لو بنيت هدفك القريب على أساس صح 

هتحقق هدفك البعيد صح 

وهو الجنة بإذن الله

وفقنا الله وإياكم للعمل الصالح وأرزقنا شفاعة النبى محمد عليه الصلاة والسلام 

إبدأ ... ( إنت العنوان ) .

إعمل حملة تفتيش جوة نفسك ... إبحر فى أعماقك 

طلع المرجان اللى جواك .. طلع الافكار الغالية اللى جواك

طلع طلع طلع 

شوف مواهبك فين وفى إيه وشوف قدراتك تعمل ايه 

شوف إيه سلبياتك شوف إيه إيجابياتك شوف ايه الحاجات اللى ناقصاك كملها 

من الاخر ... إكتشف نفسك 

بعد حملة الاستكشاف اللى عملتها 

أكيد طلعت بحاجات جديدة عنك مكنتش واخد بالك منها 

عرفت قدراتك ومواهبك فين وفى ايه 

ياللا استغلها 

حط هدف ليك وابدأ حققه

مش لازم يبقى هدف كبير اوى اوى انك تكون ناجح ومشهور و .... و .... 

لا ابدأ بهدق ليه فترة زمنيه صغيرة شوية لما تشوف النجاح بعنيك 

ده هيشجعك أكتر انك تكمل 

وهتتحمس اوى لما تشوف أد ايه النجاح طعمه حلو

شوف إيه أنسب الطرق اللى تمشى فيها  و تستغل فيها قدراتك ومواهبك دى

كل واحد مننا جواه موهبة جميلة 

لو طلعها وفاد بيها نفسه وفاد بيها الناس

أكيد هنتغير للأفضل إن شاء الله 

 خلى ليك هدف 

عرفت طريقك اللى هتمشى فيه 

طيب ياللا على البركة إبدأ إمشى وغبدأ جرب وإبدا حاول 

هتقع كذا مرة ... قوم تانى وابتسم 

ربنا بيقويك بيقولك اقوى كدة واجمد 

الحياه مش سهلة 

لان لما تتعب اوى فى الحاجة اللى بتعملها 

وتنجح .... هتحس بقيمتك وهتحس انك عملت حاجة مفيدة

خليك مصمم على هدفك 

ممكن تلف شوية من طرق جانبية تانية 

المهم إوعى تتنازل عن حلمك و إوعى تتنازل عن مبادئك أبدا 

وركز فى شغلك واستعين بالله

وخلى بالك ان الملتفت لا يصل 

عارف إنت لاعب كرة القدم وهو فى الملعب ؟؟ 

بيبقى مركز فى شغله ازاى 

مبيكونش فى باله حاجة غير اللعب وبس 

وفى الاستراحة اللى بين الشوطين المدرب يبدأ يقوله سلبياته

والمدرب كمان بيعرف سلبياته فى طريقة اللعب وبيحاول يغيرها على حسب قوة الخصم اللى قدامه
إنت كمان  لو لاقيت الطرق بتاعتك وأساليبك مش قوية لتحقيق هدفك غير طريقتك شوية اعمل عليها بعض التعديلات لتكون أقوى

إنت خليك كدة من وقت للتانى اقعد مع نفسك شوف سلبياتك وصححها

دعم نفسك

إبدأ 

خليك إنسان ( إنت العنوان ) .

إنت محور إهتمامى , إنت اللى هتبنى و إنت اللى هتعمر 

وإنت اللى هتزرع وإنت اللى هتصنع وإنت اللى هتغير 

إنت اللى هتفكر و إنت اللى هتنفذ وإنت اللى هتطور

خليك فاكر يا إنسان إن نهضة بلدك ونهضة العالم كلها من جواك

ومن هنا هبدأ 

إن أى نهضة لازم هتبدأ من جوة عقل إنسان فكر فكرة يطور بيها بلده للافضل 

إنسان عقله شغال عمره ما بيستسلم للظروف ولا بيخليها هى اللى تصنعه , هو اللى بيصنع الظروف 

إنسان بجد مش كلمة والسلام 

إنسان بيفكر إزاى يخلى بكرة أحسن ليك وليه 

بكرة ده بتاعه وبتاعك وبتاع اولادكم 

أزاى يقدر يصلح غلط إمبارح ويمحيه

ويزود الايجابيات و يبدأ واحدة واحدة إنه يقلل السلبيات 

إنسان عارف وفاهم نفسه كويس وفاهم هو عاوز إيه

وعارف بردو طريقة اللى هيمشى فيه ويقدر يحقق اللى بيحلم بيه

إنسان عارف هدفه وعارف إزاى هيوصل حتى لو قابلته مشاكل وظروف كتير هيقدر يتخطاها ويستحملها وفى طريقه يكمل

أى طريق للنجاح صعب و هتقابل فيه عقبات كتييير اوى تستسلم اوعى ترجع للصفر تانى لا اصبر و كمل

إنسان متوكل على الله وواثق فيه 

إنسان بيحسن دايما الظن بالله 

إنسان بيحب الخير لنفسه وللناس 

إنسان بيساعد كل الناس فكريا او ماديا او اخلاقيا 

إنسان  عبد ربانى 

إنسان بيصلح نفسه من جواه الاول ويكون هادى للناس بأخلاقه 

إنسان مستحيل يضر غيره أصله عارف حب لأخيك ما تحبه لنفسك " فى الخير طبعا " هيحب للناس كلها الخير 

إنسان مثقف , إنسان إيجابى , إنسان بيفكر , إنسان بيطبق , إنسان بيبنى , إنسان بيعمر , إنسان بيعمل نهضة 

محتاجين كل إنسان يبقى إنسان 

محتاجين نكون إيد واحدة بس بأفكار مختلفة علشان نكمل بيها بعض 

خليك إنسان 

إنت العنوان

إنساااااااااااان 

إنت العنوان 

جواك إنت عناوين صغيرة

هنعمل عليها زووم 

صمم من جواك إنك تكون 

واتخلص من الهموم 

والسعادة معاك تدوم

بس خليك إنسان 

إنت العنوان 

لــ / آلاء الرحمن